"بدي احكي وافش غلي واللي بده يتحمل يتحمل واللي ما بده الله معه يريحني منه و من صداقته عالفيس .

انت ياللي بتحكي العدوى اجتنا من الممرض و الطبيب و الصيدلاني 

اه يخوي طبعا اجتك منهم ، انت متخبي بالبيت و يا ريت متخبي ، بتلف بالشوارع عالبزر و البيبسي خايف تنقطع منهم .

بالوقت اللي الطبيب و الممرض قاعدين بتعاملوا مع مرضى كورونا وجها لوجه بدون حتى حمايه ، ماسكات و مستلزمات عباره عن تبرعات . و يوم نضطر منشتغل بدونهم عشان نحميك و نحمي امك وابوك و ابنك و انت نايم عالتخت بتارجل و بتتفلسف و بتوزع مواعظ و حكم و بتحلل . 

انت ما عشت موقف انك تروح عالبيت من المناوبه و طول الطريق تدعي انك ما تعدي ابنك و بنتك و امك ، ما عشت تروح عالبيت ابنك يجي بده يلمسك تبعده عنك كانك بتعاني من الجرب و ابنك بكون يبكي مش فاهم ليش ، بعمرك روحت عالبيت و غيرت اواعيك عالباب و فتت على غرفه مثل الحرامي و تخبيت عن اولادك اسبوع حتى تتاكد انك انعديت ولا لا ؟ 

بعمرك عشت رعب انك تكون سبب بمرض ابنك و تكون قاعد تستنى تطلع عليك اعراض المرض ؟؟؟؟

لا عشت ولا بعمرك بتعيش اللحظات هاي و لو عشتها رح تصير تادي التحيه لاي طبيب و ممرض بتلاقيه بالشارع

بتجيب ابنك شاكك فيه و بتوقف بعيد و الدكتور هو اللي بيوخذه منك و بيحضنه و بيفحصه و ما بيسال عن حاله .

بالاخر بتيجي تتفلسف عالفيس

اكثر ناس عرضه ينصابوا هم الكادر ، و هذا طبيعي ، بعمرك شفت حرب بدون جرحى و موتى بين الجنود ؟؟؟ الغريب انه ما يكون بينهم مصابين

الممرضه المصابه انعدت من مريض و فقدت شخصين من اهلها بالمرض ، بتتخيل موقفها ، انقذت مريض و تسببت باصابه اهلها

الدكتورين المصابين وصلوا المرض لاهلهم ، متخيل موقفهم ؟؟؟؟

يا رجل انت عارف انه المستشفيات وباء ، لا تيجي عشان تفحص حمل و لا عشان ابنك بتلعثم بالحكي من سنه و لا عشان رشحه ولا تدق ابره b12 ، ارحم حالك وارحمنا من  طيشك ، وزير و وزاره و كوادر و جيش و امن هلكوا ، ارحموهم و ساعدوهم عشانكم

هسا عنا بالاردن 300 تقريبا منهم اربعه كوادر طبيه والبقيه ناس عاديين ، ما شفناكم نشرتوا أسمائهم ولا  صورهم ولا اسماء خواتهم ولا صور اهلهم ، استحوا على حالكم كلنا اولاد عشائر واللي بصير مش مقبول بمجتمعنا .

كلهم مسموح يمرضوا بس المسكين خط الدفاع الاول ممنوع واذا مرض مصيبه و بتشرشحوه .

لا تضطروا الكوادر تشتغل بلا نفس لا تخلوهم يشتغلوا و كانهم بين اعداء ، اغلب الكوادر سوف تصاب لكثره تعاملها مع مرضاكم واذا كل واحد بدكم تعملوله فضيحه اكيد ما رح يعلن مرضه 

الصحافه الصفراء و صفحات الفيس الغبيه اللي بتفضح المصابين ، انتم دمرتونا كيف بدكم الواحد يحكي عن مرضه اذا رح يخاف من فضايحكم 

التزموا بيوتكم مشان الله و ما بدنا الصحفي اللي جواكم يصحى ، 

ارحموهم ارحموهم ، والله الكوادر عايشين عيشه لو انت تعيشها ما بتقعد يوم .

كلمه شكرا بتكفي واحد بناوب 30 ساعه متواصله عشانك و بعد هيك بروح عالبيت بسجن حاله بغرفه يستنى يشوف مرض ولا لا و ببعد عن اهله ، النا شهور بعيدين عن اهالينا مشانكم

اللي بده يحكيلي هذا واجبك ، نعم هذا واجبي و واجب الجيش والامن بس عالاقل واجبنا نحارب الوباء و مش الغباء

بدي اورجيكم غدا و عشا هذول الكوادر اللي بتسبوا عليهم هاي الصوره غدا و عشا اليوم ، فوق التعب و قله القيمه جوع ، و يا ريت في محلات فاتحه نطلب اكل ، لكن فدا الوطن ، و فدا كل مواطن محترم 

الله يحمي هالوطن و يحمي قيادته

التعليق لكم 

ارحموووووونا"

د.قتيبة مياس