الشريط الأخباري : بقلم العميد المتقاعد هاشم المجالي 

نفسي افهم شغلات كثيرة بتصير بالبلد لا يستوعبها العقل والقلب والدين..

لما حكومة تنكحش من الشعب بمحافظاته كلها بسبب قانون الضريبه. ويمر القانون. 

ولما رئيس حكومة يوعد بإلغاء الهيئات المستقلة ولم تلتغي لا بل زادت..

ولما يزور بركة البيبسي ويوعد بانهاءها..وبعدها باقية تطلق رواءحها وآفاتها. 

وانهاء الطريق الصحراوي بتحويلاته  ولم ينتهي طريق الموت لا بل زادت الضحايا وزادت التحويلات والحفر. 

ولما يوعد بمحاسبة المسؤولين عن فاجعة البحر الميت ولكنهم لم يحاسبوا لا بل كافؤوهم  بتعينهم سفراء. 

ولما يوعد بإلغاء التعيينات للطنطات الجونيات، ،ولم تلتغي التعيينات لا بل عينوهم بوظائف  أحسن من التي أعترض عليها الشعب..

 

ولما يوعد بمحاسبة الفاسدين وينوي قصم ظهر فساد والجونيات .ولكن جابوهم وعينوا بعض منهم  وزراء وبقي الأخرون من الجونيات ينفذون العطاءات وراحت بكيس الفقراء...

نفسي افهم ليش كلاب بوليسيه بتفتش دوائر حكومية..

 وإقامة ولائم نيابية للفاسدين..وحضور أصحاب الدولة والمعالي لأعراس الفاسدين المساجين بقضايا فساد..

يا جماعة نفسي والله أفهم أن الحكومة الي بدها تجيب مستثمرين أجانب ، لكن المستثمرين الأردنيين هاجروا وطفشوا وهجوا على تركيا وجورجيا كيف بتصير  مش فاهم  ..

يا جماعة نفسي أفهم شعب كله مطلوب للتنفيذ القضائي اذا مش اليوم بكره...

والله حاب أفهم ليش أكثر دولة بتعقد وبتقيم  و بتشارك بمؤتمرات عن الإستثمار ومحاربة الفساد وتطوير التعليم المدرسي والجامعي..وما عنا استثمارات..واولادنا صاروا يطلعوا يدرسوا توحيهي بتركيا  وجامعاتنا الحكومية  صارت غير معتمدة والخاصة يملكها أشخاص يعترفوا أنهم حمير وثيران ، ومع هيك مؤتمراتنا بعدها شغالة ..

يا جماعة والله نفسي افهم..فيمن يقدر يفهمني إحنا وين  وكيف وليش وشوا النتيجة..نفسي أفهم فهمونا كيف السالب بنجذب للسالب والملح  بحل محل السكر بالشاي والناس بتشربه وبتمدحه  ..

اقسم بالله نفسي افهم فهموني يا جماعة  مشان الله..