خاص / 

فاجا الطبيب في مركز الحسين للسرطان فراس الخلايلة الرأي العام الاردني بعد نشره قصة وفاة والده قبل عام ونصف داخل مستشفى حكومي في الاردن. 

رسالة الطبيب والتي لقيت الاف المشاركات وردود فعل واسعة وغاضبة عبر التواصل الاجتماعي ، كشفت مدى استهتار بعض الاطباء والتمريض بالمواطنين . 

وتاليا نص الرسالة التي كتبها الطبيب حول وفاة والده..

"الأرض باردة يا بنيّ ....حط ع حالك جاكيتي"

هاي الجملة الي حكاها أبوي قبل ٣ ساعات من وفاته. 

كنت أنا نايم عالأرض الي جنب تخته في الطوارئ وعامل جاكيتي مخدة وما في اشي أحطه على حالي...

في ٣٠/٣/٢٠١٩ وتحديدا على الساعة ١١:٣٠ بالليل قررت أخد أبوي على طوارئ أحد المستشفيات الحكومية واللي بفضل عدم ذكر اسمها...

أبوي كان يشكي من حرقة بالبول مع قشعريرة...بحكم إني طبيب كنت عارف هذا التهاب بول شديد وبحاجة لمضاد بالوريد مش بالفم...

أبوي حدا بسيط ..سائق تكسي قديم....لا عنده تقاعد ولا ضمان ولا تأمين صحي....بس كان من فترة فرحان كثير انه حصل على اعفاء بهذا المستشفى ...وقلنا منيح هاي اول استخدام لهذا الاعفاء....مسكين أبوي كان فرحان كثير بالاعفاء....كان مخبيه بخزانته وحتى كان مش حاب يطويه عشان ما ينطعج...يعني بتحس الورقة مكوية كوي....

ما كان عارف انه أول استخدام لهذا الاعفاء رح يكون لاصدار شهادة الوفاة...

بالطوارئ تبين أنه أبوي عند انخفاض بالضغط... يعني طبيا هذا يعرف بتسمم الدم أو ال Urosepsis ....في هيك حالة اذا ما ارتفع ضغط المريض مع السوائل بنعطي المريض أدوية حساسة جدا لرفع ضغط المريض...هذا النوع من الأدوية خطير جدا لهيك ما بنعطى الا بوحدة العناية الحثيثة ICU لأنه أي قطرة زيادة ....ممكن ترفع للضغط كثير وتعمل مشاكل وقد تؤدي للوفاة....هي صراحة أدت وخلصت مش "قد"..

قلي الطبيب المقيم بدنا نبدا أبوك على نورايبنفرن اللي هو الدوا الي برفع الضغط

-قلتله "اه يعني ICU؟؟"

-قلي رح نعالجه هون بالطوارئ لانه ما في أسرّة بالICU

-قلتله"طيب متى ممكن يفضى سرير ...لأن من غير المنطق تعطيه الدوا بالطوارئ"

- قلي "للأسف حتى لوفضي سرير الأولوية للي اعفاءهم ديوان مش وزارة صحة "

-قلتله "كيف يعني ؟؟!! بلكي الحالة حرجة!!"

- قلي" عادي بنعالجه هون لانه الديوان بحاسب المستشفى اسرع من وزارة الصحة"

نعم...هذا الحوار صار بالحرف....اعفاء المريض هو الي بحدد وين رح يتعالج..!!

وكلت أمري لله....ووافقت لأنه ما قدام خيار ولو طلعته من المستشفى وضغطه هيك ممكن يصير اي شي وانا بالطريق....

طبعا أبوي انحطله الدواء بابرة بوريد الايد مش وريد الرقبة(زي ما هو بالصورة)...طبعا والأهم بدون ممرض واحد مع الحالة....يعني كان في تمريض بس كان معهم ٢٠ مريض ثاني....عكس كل مريض ICU لازم يكون عنده تمريض واحد خاص فيه...

في هذيك الليلة ما ببالغ لو قلت إني التمريض أجا على أبوي ٣ مرات خلال الشفت ومرتين منهم كانت من قد ما نقيت عليهم... بالاخر اختصرت على حالي وصرت أنا الممرض تبعه وصرت أقيس الضغط كل ٣-٥ دقائق وأعدل الجرعة حسب قراءة الضغط....

هذا الكلام كله كان ما بين ١٢ ليلا و ٨ الصبح ... خلال هذا الوقت كنت بحاول أغفى لو بس ١٠ دقايق بس عقلي كان مشغول بقراءة الضغط ...فكنت أقوم أقيسه ..لدرجة إنه في إحدى المرات عصب علي وقلي "مش عارف أنام قد ما قسته"....معلش يابا عشانك...

الساعة ٨ صباحاً...ساعة تبديل الشفت بين التمريض ...طلب أبوي إنه يروح عالحمام...فكيت الابرة وأخذته...بس رجعنا طلبت من وحدة من الممرضات ترجع تحطله الابرة والدوا..

لما ركبت الابرة حكتلي "ليش العمو عنده ابرتين؟؟"

كان ابوي عنده ابره لدوا الضغط وابرة للمضادات الحيوية والسوائل...

هي كانت حابة تخفف الابر عن العمو...فققررت تفك الابرة الاولى وتحطه في pump الي فيها دوا النورابرنفرن بحجة انه في ال pump مكانين وممكن ينحط دوائيين ...فهيك العمو بكون عنده ابره وحدة بس.

لما حكتليها بس هيك ما بصير...حكتلي حضرتك ممرض؟

حكتلها لا انا طبيب بمركز الحسين وبعرف انه هاد الدوا مش هيك بنعطى

بكل برود حكتلي بس دايما بنعمل هيك...سلامته.

اول ما كبست Start ...وبالضبط خلال ٩٠ ثانية..ابوي اختلف فجاءة...المونتر صار يزمر ...الضغط ٢٩٥ على ١٥٠ ... ضربات القلب ١٨٠... أبوي بتشاهد ..ابوي مات...

لهسا بتذكر كيف اتشاهد وهو بشد على ايدي وبصرخ.... انا مش عارف شو قاعد بصير...ولا فاهم... لسا قبل خمس دقايق قبل ما تجي الممرضة كان بحكلي عن محمد صلاح والان ابوي في ذمة الله... !

السبب بسيط....كل الدوا تاع الضغط اتفرغ بدمه نتيجة وضع السوائل في نفس الجهاز.

بطبيعة الدوام بمركز الحسين بتشوف كثير حالات code blue الي هو انعاش القلب لشخص توقف قلبه... لكن صدقا ما اتخيلت يكون حدا من أهلي... وصدقا الوجع على حجم المصاب...

تأكيدا للسيناريو الي صار ... بعد شهر دخلت عمتي نفس المستشفى...ولأجل الصدفة...كان نفس الطبيب المناوب...تكلمنا بالقصة وكان نوعا ما مستغرب السيناريو...لنقطع الشك باليقين انزلنا على CCU وسألنا رئيس التمريض...ورجناه ال pump وحكنالو لو عملنا هيك هيك بدون ما نقله انه هاد الي صار فعلا.. .اول شي حكالنا ياه..."شو صار بضغط المريض؟؟؟" اطلعت انا والطبيب ببعض وحكيتله توفى...قلي متوقع لانه هاي الماكينة قديمة وبس تحط معها اشي تاني بتسحب من الاشي الاول...

ممكن اي شخص يقلي ليش ما منعت الممرضة بحكم انك طبيب ....بكل بساطة لانها حكتلي دايما بنعمل هيك ولاني بحياتي مش شفت زي هالجهاز..ولانه ما عندي اي خبرة فيه سكتت...  والأهم....اني عرفت هالاشي بعدين مش بلحظتها..

نعم أبوي الشخص البسيط...سائق التكسي القديم... ...ورجل المساجد..أحن رجل بالارض...صار الان جثة هامدة قدام ابنه الطبيب الضعيف...

ابوي الي اكبر فرحة بحياته كانت فرحة معدلي بالتوجيهي... ابوي الي انحرم التعليم وشافه بابنه... ابوي الي كان حافظ كل علامة عالية بجيبها بحياتي قد ما هو فخور....أبوي الي كان كل ما يمر بمجمع رغدان كان يجيبلي كوكتيل من رنوش عشان اركز وانا بدرس وCDs..كلها بتحكي عن الطب لما كنت طالب مدرسة..ابوي الي اكبر مصايبه بهذيك الليلة كانت انه مش قادر يتوضى لانه عنده بربيش بول..ابوي الي كان مقهور انه اول مرة بتروح عليه صلاة الفجر من ٢٠٠٢.. ابوي الي كان دايما يقولي " يابا امشي الحيط الحيط وقول يارب ما يوقع الحيط...."...  ... أبوي صار مُسجى قدامي... انا واياه لحالنا.....ولا حد من أهلي.... ابوي توفى وتركلي خمس اخوان اصغر مني وأم مريضة بالسرطان وأخوه الي كان عايش معنا و بحتاج رعاية خاصة لانه عنده متلازمة داون...

الموت صعب جدا ...لكن اصعب شي في الموت...انه الشخص الي قدامك ينخطف فجاءة... والاصعب يكون ابوك وانتا دكتور...وتشوفه بموت وانتا عاجز..

القصة صارلها سنة ونص...وانا ساكت.. اليوم حكيت ...حكيت لما جدة صاحبي من اسبوع صابتها جلطة قلبية والدكتور قرر يأجل القسطرة لثاتي يوم والمريض توفى...

اه الطب بالاردن قوي...وقوي جدا ...لكن حجم الاهمال والاستهتار الموجود كمان قوي جدا... 

انا خسرت أبوي بسبب خطأ ممرضة غير متمرسة ...وسياسة مستشفى متخلفة...انا طبيب وقدرت اشوف هالاشي بعيني... بس قديش في أهالي بسيطة مات الهم ناس وكان الرد من المستشفى" ما قدرنا نعمل اشي...جلطة حادة... العمر الكم" والسبب هو اهمال فقط...

ممكن يجي حد يسألني شو عملت للممرضة..وليش ما شكيت... او لجأت للقضاء...الجواب بسيط... انا بالاخر بحكي حكي ودليلي الوحيد هو الصورة الي تحت الي مبين فيها انه تخت طوارئ وانه الدواء بابرة الايد...وهذا غير كافي...والقضاء رح يطلب تشريح...وانا ما بشرح ابوي ..اخر شي بدي ياه اني اشوف ابوي بمشرحة...فاحتسبت امري الى الله وأجري على الله...

قبل اسبوعين ابوي كان رح يكون عمره ٦٠... ابوي الي راح ماشي ورجع مكفن ..

سنة ونص وانا زي الاسفنجة... على قد ما بمتص صبر...على قد ما بعصر ألم...

وفعلا يابا.... الأرض كثير باردة.... باردة كثير...لأنه أدفى مكان فيها هو التراب الي فوقك....