الحمد لله ، اليوم تعرفت على صبية حلوة وما شاء الله عليها ، طبعاً تعرفت عليها بمحض الصدفه ، عند اول تحويلة ابو صياح على طريق الاوتوستراد ، طبعاً هاي تحويله جديدة عشان الباص السريع الي بده كمان 5 سنوات تا يخلص هاااظ اذا خلص..

المهم ما علينا ، انا عالصايد اليمين وهي عالصايد الشمال ، اطلعت عليّ واطلعت عليها ، وكثير اعجبت فيها ، وهي كمان ، مِشيت هي بسيارتها وانا مشيت شوي ، وسالتها عن اسمها ، وسالتني عن اسمي ، وتعرفنا على بعض ووين بنشتغل وشو بنعمل بالحياة ، مِشيت شوي بسيارتها ومشيت انا شوي بسيارتي وحكينا اكثر عن فكرة الارتباط ، وانه وين راح نسكن ، وبحال تقدمتلها بالفترة الحالية كم راح تقعد فترة الخطوبة ، طبعاً ردت مِشيت بسيارتها شوي وانا مشيت بسيارتي شوي ، والحكي هاض كله من الشباك ، ولما طلبتها رقم تلفونها ، طلع تلفونها طافي شحن ومش حافظه رقمها ، وضلت تحكي معي من شباك سيارتها وانا بحكي معها من شباك سيارتي ، لحد ما وصلنا جسر ماركا تقريباً.

طبعاً هاي مرحلة جديدة تعتبر على حياتي ، وبلشت اتطرق لموضوع الخلفة ، وشو بدي اسمي ابني الاول ، هي حكتلي اذا بنت بدي اسميها ياسمين ، واذا ولد انت سميه ، حكيتلها اذا ولد بنسميه سيف ، هي رفضت طبعاً لانه هذا الاسم ما بتحبه عشان في ممثل خليجي اسمه سيف بتحسه ما بعرف يمثل ، واتفقنا بالاخير انه الاولاد انا بسميهم ، والبنات هي بتسميهم ..

مِشيت شوي وانا مشيت شوي ووقنا عند عريفة مول ، ويا حبيبي هناك بلشت المشاكل بينا ، هي بتحكيلي ليش بتطلع على البنت الي واقفه عند النفق وانا بحكيلها ما اطلعت ، وهي بتحكيلي لا اطلعت ، وصوتنا طلع على بعض ، والسيارات الواقفة الي ورانا وقدامنا صارت تزمر ، من باب انه نوطي صوتنا ..

طبعاً انحلت المشكلة ، ومِشيت شوي وانا مشيت شوي ، ووصلنا للاشارة الي قبل دوار المدينة الرياضية واتفقنا انه العرس يكون اخر السنة ، ونعمله بصالة من صالات الزرقا ، ونعزم الي بنعرفهم ، واتفقنا على اي صالون بدها تروح ، وبدلة العرس من وين بدها توخذها ، واتفقنا على كل اشي .

فتحت الاشارة ووصلنا دوار المدينة الرياضية ، وفتحت الطريق للاسف وانا طلعت على الجاردنز وهي اذا ما خاب ظني ظلت طالعه لفوق على الشميساني ...

كله بسبب الحكومة خربت احلامي وطموحاتي ... معاناة يومية #الباص_البطيء مش السريع

علاء الذيب