المخرج المصري باسل رمسيس يدافع عن المعتقلين الاردنيين .. والخارجية الاردنية خارج التغطية
الشريط الإخباري :
/ خاص
وجه المخرج المصري باسل رمسيس رسالة عاجلة للاردنيين مطالبا اياهم الوقوف خلف الشبان الاردنيين الذين اعتقلتهم قوات الامن المصرية قبل ايام بتهمة التظاهر ضد نظام السيسي .
المخرج رمسيس الذي اكد برسالته ان الشبان لا يحملون اي فكر سياسي وانما يتواجدون بمصر بهدف دراسة السينما والاخراج .
وتاليا نص الرسالة التي نشرها المخرج المصري بعد السبات العميق الذي تتلحف به الخارجية الاردنية
الكلام اللي هاقوله هنا مسؤول عنه مسؤولية كاملة. وكلامي هايكون بلغة مؤدبة جدا، رغم غضبي، عشان الناس اللي مش بتشير بوستات فيها شتيمة:
عمرو أديب إمبارح عمل فقرة عن عناصر سماها "إثارية" وجواسيس، جايين مصر يخربوا. طلع مجموعة ناس من ضمنهم واحد أردني أسمه "عبد الرحمن علي الرواجبة". أنا أعرف الشاب ده كويس جدا. وبنتكلم مع بعض كتير، وفيه علاقة معاه أقرب للتبني بحكم فرق السن، وكمان صديقي. وغالبا أنا أخر واحد عبد الرحمن عمل معاه شات قبل ما يتقبض عليه من البيت فجر يوم الأتنين.
عبد الرحمن كان طالب عندي، آخد معايا ورشتين سينما طوال في مصر، واحدة في ديسمبر اللي فات، والتانية في شهر أبريل. ورشتين من اللي بنعيش فيهم سوا. وأعرف أن الشو اللي الأجهزة عملته مع عمرو أديب إمبارح كله كدب، علي الأقل في حالة عبد الرحمن:
١) عبد الرحمن يساري، لكن اهتمامه الأساسي بالسينما، والسينما التسجيلية تحديدا. ومش بيمارس أي نشاط سياسي. وماهواش حاليا عضو في الحزب الشيوعي الأردني. زي ما قالوا في البرنامج.
٢) عبد الرحمن حاول يدرس سينما في أوروبا ولأسباب مادية كان صعب. فاقترحنا عليه من شهور أنه ييجي مصر، يدخل في ورش، ويحاول يتواصل مع الأجواء السينمائية ويتعلم خلال الممارسة. وعشان كدة هو في مصر.
٣) عبد الرحمن إتقبض عليه من البيت فجر يوم الأتنين. مش من الشارع زي ما عمرو أديب قال. يوم الحد مساء وقفوه في وسط البلد لمدة ١٥ دقيقة وفتشوه وفتشوا تليفونه وسابوه. هو كان خايف، كلمني يحكيلي وقلتله يروح ويسيب وسط البلد. رجع الشقة اللي مأجرها في المعادي. ومن هناك كلمني تاني وقاللي أنهم قبضوا علي صاحبه "ثائر" اللي طلعوه برضوه في برنامج عمرو أديب. وكان قلقان علي صاحبه ومش عارف يعمل أيه. قلتله يهدي ويحاول يكلم رقم الطوارئ بتاع القنصلية الأردنية. ماكانوش بيردوا. فنصحته أنه ينام والصبح يروح السفارة يبلغهم بموضوع ثائر. والصبح عرفنا عن طريق السمسار أنهم جم أخدوه بالليل.
٤) فضلنا يومين بنكلم ناس في الأردن، وناس "مهمة" في مصر عشان يساعدوا. الحاجة الوحيدة اللي عرفناها أنه في الأمن الوطني. وقررنا ماننشرش ولا نعمل دوشة عشان الموضوع يتحل بالراحة. خلال اليومين دول اللي هو كان فيهم في الأمن الوطني، يعني إمبارح وأول إمبارح، الظباط إستخدموا حسابه الفيسبوكي، وفيه احتمال أنهم إستخدموه عشان يحبكوا التمثيلية. يعني تبقي محبوس في الأمن الوطني، والتليفون مش معاك، وبتخش تعمل لايكات علي بوستات فيها شتيمة في السيسي؟؟!! ده أسمه كلام؟؟
٥) مش هاتكلم عن أراء عبد الرحمن السياسية، لأن مش من حقي. بس عارف كويس جدا أنه مش شايف أن حكم الإخوان كان شرعي. وعارف كويس جدا أنه ماشتركش في مظاهراتهم، ولا أنه جه مصر عشان يشارك في التخريب والإثارة. زي ما أجبروه يقول. كل اللي إتقال في البرنامج موديل تم تلقين المعتقلين غير المصريين أنهم يقولوه. والله أعلم أيه اللي إتعرضله عبد الرحمن عشان يجبروه يقعد قدام كاميرا ويقول الكلام ده.
٦) معرفش لو عبد الرحمن صورفيديوهات في الشارع ولا لأ. بس أصلا يوم الحد ماكانش فيه أي حاجة بتحصل في وسط البلد غير إرهاب الشرطة للمواطنين ومطاردتهم وخطفهم. وأعرف كويس جدا أن عبد الرحمن مانشرش أي فيديوهات زي ما هم أجبروه يقول في برنامج عمرو أديب. عبد الرحمن كان في حالة حداد علي جدته اللي إتوفت قبلها بيومين.
اللي بيحصل تدمير كامل لأشخاص بريئة، وتدمير لمستقبلهم، عشان السلطة تحبك تمثيلية تافهة وحقيرة أن فيه جواسيس وناس جاية من برة. نفس اللعبة القديمة بالظبط، حتي مش هاين عليهم يغيروا نص الكلام اللي أجبروهم يقولوه قدام الكاميرات.. فبيخلوهم يكرروا نفس النص.
باسل رمسيس
