جهاد ابو بيدر يكتب بالعامية : ضربة "ايران" للكيان مسرحية هزلية .. لماذا يُصر البعض ان يبقى في صفوف "الكومبارس" ..؟؟

نشر الزميل جهاد ابو بيدر على صفحته الشخصية في شبكة التواصل الاجتماعي فيسبوك بوست تجنب فيه اللغة الفصحى وكتب بالعامية في محاولة منه لايصال رسالته للبعض ممكن يروجون لبطولات ايران الوهمية بضربها المسرحي والتمثيلي للكيان الصهيوني في ردها على ضرب سفارتها في دمشق قبل ايام ، وجاء كلام ابو بيدر مؤثر ومقنع بتفاصيله وتحليله ورده على المنتقدين لمن اطلق على حركة ايران "المسرحية"

واليكم ما جاء في تغريدة الصحفي المخضرم جهاد ابو بيدر : 

((لا يعني أنك بتحب إيران وشايف انها عملت معجزة بهجومها على إسرائيل فتبلش فينا احنا اللي مش شايفين هالشي يا سيدي وتتهمنا بالخيانة والسذاجة والعمالة ومش عارف شو  بس لانه حكينا مسرحية .بجوز احنا عنا قصر نظر وما بنفهم بالتحليل العسكري ولا احنا الدويري ولا عنا معلومات مثلك احنا ع قد حالنا شفنا الفعل وشفنا ردة الفعل ومن خلاله حللنا  ..ليش مين حكالك انه ما نفسنا انه إيران تبيد اخرائيل عن بكرة  ابيها انتقاما وثأرا لدماء أكثر من ٣٠ الف شهيد في غزة ومين حكالك انه احنا ما بنتمنى انه تركيا تلعن سنسفيل ابو الكيان لانه خلص احنا وصلنا لقناعة انه ولا دولة عربية بتقدر تطخ رصاصة عالعدو فصرنا نبحث عن بطل ولو من ورق بس يفش غلنا .بس لما نشوف هيك ردة فعل ما رح نقعد نصقف مثلك ولا رح نقعد نقول يا ريت الدول العربية تعمل مثل هيك مسرحيات واللي بحكو انه غزة نامت ليلة هادئة بسبب الهجوم الإيراني ترى غزة من ١٩٠ يوم ما نامت ليلة هادئة حتى ليلة الهجوم الإيراني .من ١٩٠ يوم ما حركت إيران دماء الالاف من الشهداء والجرحى ولما استهدف الكيان القنصلية قامت القيامة ...مثل ما احنا محترمين وجهة نظرك ومنشوراتك انه إيران قامت بعمل اعجازي وضربت الكيان من عمق اراضيها وما استخدمت وكلائها  بالمنطقة فكمان انت احترم وجهة النظر اللي بتخالفك وما تقعد توزع اتهامات معلبة زهقنا منها وصارت أسطوانة مشروخة واللي بحكي على الاقل اذا كانت مسرحية كون انت كومبارس فيها يشد حيله هو ويكون الكومبارس اللي بحكي عنه واحنا رح نعمل حملة تصفيق هائلة الو بعد نهاية العرض .يعني بالمعنى احنا نازلين ببعض طس ع السوشيال ميديا اشي مع إيران واشي ضد إيران ولكن الدم ما زال يراق في غزة وهذا بيت القصيد))