لا فيصلي ولا وحدات .. وحدة وطنية للممات
الشريط الإخباري :
نشرت صفحة حي الطفايلة تغريدة راقية معبرة تسبق مباراة ختام دوري المحترفين الأردني والتي تجمع فريق الوحدات والذي حاز على بطولة الدوري قبل مرحلتين من ختامها مع شقيقه فريق الفيصلي والملقب بالزعيم.
ونترككم مع ما جاء بهذا البوست مؤكدين بالوقت نفسه ان وحدتنا الشعبية خلف قيادتنا اهم واعظم من البطولات والفرق الرياضية والكؤوس والدروع وما يهمنا ان يبقى الأردن واحة أمن وآمان في ظلال الراية الهاشمية المظفرة.
مع اقتراب مبارة #الوحدات_الفيصلي
اقرأ....
الفيصلي / الوحدات
فلسطيني / أردني
ملوخيه / منسف
شماغ أسود / شماغ أحمر
شمالي / جنوبي
سؤال وبدي الكل يجاوب عليه بصراحه !
لو شفت عمارة مولعة فيها النار وكل الناس تحاول تنقذ المصابين وتسعفهم وتطفي النار بتروح تساعدهم مباشرة ولا بالأول تسأل مين سكان العمارة اردنية ولا فلسطينية!!
طيب لو كنت ماشي ولقيت عجوز كبير مش قادر يقطع الشارع من السيارات .. تسأله قبل ما تساعده إذا هو اردني ولا فلسطيني ؟؟
طيب آخر سؤال . .
لو شفت طفل ضايع بالسوق ويدور على أمه ويبكي .. بتساعده ولا بتسأله عن أصله وفصله !!
تخيل حالك بالسيارة ولما وقفت عالاشارة اجاك طفل معاه علكة يترجاك تشتري منه وبس عرفت أنه فلسطيني بهدلته وسكرت الشباك وكسرت بخاطره ... وبنص الطريق صار معك حادث وما لقيت حدا يساعدك الا عامل وطن فلسطيني .. ساعتها شو يكون موقفك ..
تخيل انك تكره كل الاردنية وطلعت رحلة مع زوجتك وعيلتك بمكان فاضي واجاك اكمن ازعر بدهم يجهدوا بلاك وفجاة لقيت شباب اردنية ما تعرف منين طلعوا وطردوا الزعران وخلصوك من شرهم وعزموا عليك تتغدى عندهم وواحد منهم اعطاك رقمه وحكالك اي خدمة أنا جاهز... ساعتها بتغير نظرتك للاردنية ولا لا؟؟
شو هالفرق العظيم الي بينا ! ممكن تجاوبوني!!
شماغ الاردني أحمر والفلسطيني اسود ..؟؟
اصلا الشماغ الاحمر كان لونه اسود وبعد ما تلطخ بدم الشهداء بالقدس أيام الحرب صار لونه أحمر بلون الدم ..
ليش رابطين الفيصلي بالاردن والوحدات بفلسطين !!
ليش خليتونا نحكي اردني اردني ولا اردني فلسطيني مع أنه كلنا اردنيين وكلنا نعشق فلسطين..!
لوين بدكم تبعثوا البلد .. لو صار حرب بينا "لا قدر الله" شو رح يكون موقف الي عمه فلسطيني وخاله أردني أو العكس!!
مالكم يا اخوان اصحوا والله أنه يربطنا الدم والنسب والعرض والارض والقضية وعز الاردن وتحرير فلسطين .. ترى ما في النا غير بعض حطوا مخافة الله بين عيونكم ولا تهدّوا الي بنوه أجدادنا ..إحنا الي صنعنا العنصرية وبإرادتنا وحبنا لبعض نقضي عليها.
تعرفوا انه الفيصلي .. أول نادي اردني لعب على ارض فلسطين! وكان الجمهور الفلسطيني يستقبله بالورد ويشجعه خصوصا بالخليل..
تعرفوا انه اذا فلسطين تصرخ الاردن تبكي .. واذا الاردن تحكي ولا الضالين فلسطين تحكي آمين.
#منقول
