وينكم ..؟! الله لا يخلف عليكم ..
الشريط الإخباري :
نعل بسطار قديم لعسكري اردني بطل يقوم بواجبه لحماية الوطن ولدفع المحن والبلايا والشرور عنه ولحماية المواطنين من الأوبئة، أشرف من رؤوسكم يا قليلين الحيا .
منديل ورقي لطبيب منهك او ممرض يمسح عرق جبينه في مستشفيات الصحة او الخدمات أطهر منكم يا أراذل القوم ياللي اغتنيتوا من خيرات بلدنا ، وعملتوا شركات وتجارات ، واسثمارات في الداخل والخارج ، وامتلكتوا وكالات وماركات ، وفنادق، وبنوك، واستيراد وتصدير ، وسيارات فارهه، ومزارع، وعقارات وطيارات ومصانع ،وقصور، وفلل، وعمارت، وعشرات ومئات الملايين والمليارات وبعدكم ماشميتوا ع حالكم وما فزعتوا للوطن يا عاقين.
وين كمان اللي اغتنوا من أموال البلد من أصحاب النفوذ، والمناصب ،والكراسي، والمكاسب، وينكم وين( مجحرين)
وين جماعة الهيئات والامتيازات والعطاءات والتسهيلات والإعفاءات ؟.
وين جماعة الرشوات، والتهرب الجمركي والتهرب الضريبي والسرقات ؟
وين جماعة الشلل والصالونات والسفرات والسهرات، والمنكرات ، وتهريب الدخان والمخدرات؟.
أقصدكم أنتم ياللي ماعندكم ذرة خجل ولايندى لكم جبين ، ياللي درتوا ظهوركم للوطن وغبتوا عن المشهد وتواريتم عن الأنظار وتخبيتوا ؟
وينكم لا إلكم حس ولا نس ولا خبر ؟
وينكم يا اللي ما عندكم مرؤة ؟
وينكم ؟ اذا الاردنيين العاديين قاعدين يتبرعوا وفازعين للبلد وأُخوة عراقيين كرماء يتبرعوا للأردن والأردنيين بسخاء ؟وانتوا كشفتكم كورونا كشفت بخلكم وانانيتكم وما تبرعتوا وما بدكم تسندوا الوطن وتشيلوا مع الدولة، وما بدكم كعادتكم تتبرعوا للمحتاجين والفقراء والمساكين والمواطنين اللي بدون عمل ولعمال المياومة ولأصحاب الأعمال الصغيرة والمتوسطة والحرف والمهن اللي رزقهم حلال ومن عرق جبينهم، يوم بيومه، واللي توقف شغلهم بسبب منع التجول واجراءات الدولة الحكيمة في هذا الكرب الذي يمر به الوطن .
وينكم يا أشباه الرجال، ليه ما تسندوا الدولة وتتبرعوا لوزارة الصحة وللمستشفيات؟
الله لا يخلف عليكم .
وينكم؟ لازم الدولة تسويلكم جردة حساب عنوانها (من اين لكم هذا) حتى تكشف للشعب سرقاتكم وأموالكم ومن أين اقترفتموها؟
أستثني الشرفاء اللي رزقهم حلال والذين في أموالهم حق معلوم للسائل والمحروم والذين مدوا ويمدون أيديهم لمساعدة الاردنيين المحتاجين والذين تبرعوا لإسناد وزارة الصحة ومستشفياتها ومؤسسات الدولة ذات العلاقة.
د.عساف الشوبكي
