في الذكرى الـ ( 15) على إستشهاد الرئيس الرمز ياسر عرفات ....

أكرم الصوراني يكتب من غزة هاشم

15 سنه ولسه الناس فرحانه بصورها معك 

15 سنه وجيل الفيس بوك اللي ما عاشك حاطط صورتك ع البروفايل وعلى كتفه الكوفيه اللي من ريحتك ولونك الأبيض والأسود مش هاديك الألوان 

15 سنه ولسه ما نسيوك حتى لو مرت الذكرى هيك حاف بدون مهرجان وبدون ما ندخل بالتفاصيل 

15 سنه المذيع بتغير والسؤال ما بتغير وهوا حامل صورتك وبسأل الشارع شو بعنيلك هاد الشخص بتحس الناس حدا مغششها نفس الاجابة هاد أبونا حاجه هيك فيها حنين لحاجات كتير وطعم ما بحس فيه إلا اليتيم 

15 سنه والاغاني لسه بتجيب في سيرتك حتى هاديك القناة اللي كانت ما تحبك جايبه أغنية وحاطين بأولها صوتك وإنت بتحكي "الوحدة الوطنية" ..

15 سنه مروا بعدك بحب أطمنك إحنا بخير وما تصدق الاشاعات اللي بتحكي إنو عنا انقسام وجدار بين غزة ورام الله وإنو في صفقات واتصالات من تحت لتحت ومصالح من فوق لفوق صدقني الكل هموا الوطن بس هيا حبة ظروف إلها علاقة بقلة أخلاق وقلة أدب وقلة حيا خلت ما حدا سائل بحدا وكله في الهوا طار الله وكيلك لا مينا ولا شيكل ولا 100 دولار ولا ولا مطار  .. 

آه نسيت أحكيلك بالنسبه لصورة حلمك اللي لن يكتمل إلا بالقدس ضايله زي ما هيا بالجندي بنص غزة والشباب جددوها زي كل سنه وزي كل سنه حماس إنت عارف قديش بتحبك وبتحب الوحدة الوطنيه فبحكوا إنو حفاظا على سمعة الوحدة الوطنيه ما بدهم نحيي ذكراك .. لهدرجه بحبوك وبحبو الوحدة يا أبو عمار .. يسعد مساك يا ختيار

أكرم الصوراني

غزة-فلسطين المحتله